Mat 17 | NdeIBE | STEP | Ngemuva kwezinsuku eziyisithupha uJesu wathatha uPhethro loJakhobe loJohane umfowabo kaJakhobe wabaholela entabeni ende bebodwa.

Matthew 17

Ukukhazimuliswa KukaJesu

1 Ngemuva kwezinsuku eziyisithupha uJesu wathatha uPhethro loJakhobe loJohane umfowabo kaJakhobe wabaholela entabeni ende bebodwa. 2 Khonapho waguquka isimo emehlweni abo. Ubuso bakhe bakhazimula njengelanga lezigqoko zakhe zaba mhlophe njengokukhanya.

3 Khonokho kwaqhamuka uMosi elo-Elija bekhuluma loJesu.

4 UPhethro wathi kuJesu, “Nkosi, kumnandi kithi ukuba lapha. Aluba uthanda ngizakwakha imishasha emithathu – owodwa owakho, owodwa okaMosi lomunye oka-Elija.”

5 Esakhuluma, iyezi elikhazimulayo labasibekela, ilizwi laphuma eyezini lathi, “Lo yiNdodana yami engiyithandayo; ngiyathokoza kakhulu ngayo. Yilaleleni!”

6 Abafundi bathi bekuzwa lokhu bathi mbo phansi ngobuso, besaba. 7 Kodwa uJesu weza wabathinta. Wathi, “Sukumani. Lingesabi.”

8 Bathi bevusa amehlo kabasabonanga muntu ngaphandle kukaJesu.

9 Bathi sebesehla entabeni uJesu wabalaya wathi, “Lingatsheli muntu ngalokhu elikubonileyo iNdodana yoMuntu ize ivuswe kwabafileyo.”

10 Abafundi bambuza bathi, “Kungani pho abafundisi bomthetho besithi u-Elija kumele aqale afike?”

11 UJesu waphendula wathi, “Ngeqiniso, u-Elija uyeza azolungisa kutsha izinto zonke.

12 Kodwa ngiyalitshela ngithi u-Elija uvele sewafika kodwa kabamazanga, kodwa bazenzela kuye konke ababekufuna. INdodana yoMuntu bazayichukuluza ngaleyondlela.”

13 Lapho-ke abafundi basebezwisisa ukuthi wayekhuluma labo ngoJohane uMbhaphathizi.

Ukusiliswa Komfana Owayeledimoni

14 Bathi sebefike exukwini labantu indoda ethile yamqonda uJesu yaguqa phambi kwakhe.

15 Yathi, “Nkosi, ake uhawukele indodana yami. Ilesithuthwane esiyijumayo kanengi, iyahlupheka kakhulu. Kanengi iwela emlilweni kumbe emanzini. 16 Ngiyilethile kubafundi bakho kodwa behlulekile ukuyisilisa.”

17 UJesu waphendula wathi, “Hawu, lina sizukulwane esingakholwayo lesonakeleyo. Ngizahlala lani kuze kube nini na? Ngizalibekezelela kuze kube nini na? Mletheni lapha kimi umfana lowo.”

18 UJesu walikhuza idimoni laphuma emfaneni wahle wasila kusona lesosikhathi.

19 Abafundi basebesiza kuJesu ngasese bambuza bathi, “Kungani sehlulekile ukulixotsha idimoni na?”

20 Waphendula wathi, “Ngokuba ukholo lwenu luncinyane. Ngilitshela iqiniso ukuthi nxa lingaba lokholo loba luluncinyane njengenhlamvu yemastadi, lingathi entabeni le, ‘Suduka lapha uye laphayana’ izasuduka. Kakukho kini okungasoze kwenzeke.” ( 21 Kodwa uhlobo olunje aluphumi ngaphandle kwangomthandazo lokuzila ukudla.)

22 Bathi sebebuthene eGalile wathi kubo, “INdodana yoMuntu izanikelwa ezandleni zabantu. 23 Bazayibulala, kuthi ngosuku lwesithathu izavuselwa ekuphileni.” Abafundi badabuka kakhulu.

Umthelo WeThempeli

24 UJesu labafundi bakhe sebefikile eKhaphenawume abaqoqi bomthelo wamadrakhima amabili beza kuPhethro babuza bathi, “Kanti umfundisi wenu kawubhadali yini umthelo wethempeli?”

25 Wathi, “Yebo, uyawuthela.” Kwathi uPhethro esengenile endlini uJesu nguye owakhuluma kuqala wabuza wathi, “Uthini kambe, Simoni? Amakhosi omhlaba ayithatha kubani inkongozelo lemithelo – emadodaneni abo na loba kwabanye abantu?”

26 UPhethro waphendula wathi, “Kwabanye abantu.” UJesu wasesithi kuye, “Ngakho-ke amadodana akhululekile. 27 Kodwa ukuze singabakhubi, yana echibini uphosele iwuka yakho khona. Ubothatha inhlanzi yokuqala ozayibamba; uvule umlomo wayo uzafumana khona uhlamvu lwemali engamadrakhima amane. Ithathe uyiphe bona ibe ngumthelo wami lani.”